Ailawng khua-in an khaw mi tualthattu chungchang rel sak

by News Editor

Tualchhung News

ZORAM TODAY| 3rd September, 2024 (Tue): Nizana Ailawng Village Council Ieh All NGO's Joint Committee meeting chuan Lalrokima (61), S/o Thankhama (L) rawng taka silaia kaphlumtu Lallawmkima S/o Lalchhuana chu na taka an dem thu leh dan hmanga a na thei ang ber a hrem an phut thu an tarlang.

He thihna avanga tuartu zawng zawngte an tawrhpui takzet thu leh Mizoram Police chak takte avanga tualthattu rang taka zawn chhuah a nih avangin Police-te chungah lawmthu an sawi bawk a ni.

Joint Meeting chuan Lallawmkima S/o Lalchhuana chunga Action lak dan tur lungrual taka relin a pawm thu an tarlang nghal bawk.

1. Ailawng Branch YMA-in chhiatni fund leh member fee a pe kir ang a, YMA member a nihna a hlihsak ang.

2. A In ṭhiah sak a ni ang a, a hun atan September Ni 4, 2024 (Nilaini) zing dar 7:00 a ni ang.

3. Ailawng khua aṭanga hnawhchhuah a ni a, Ailawng ram leilung a rawn rap tawh tur a ni lo.

4. Ailawng khua leh tui a nihna hlihsak a ni a, Ailawng khua leh tui a nihna anga chanvo leh hamṭhatna a neih theih zawng zawng pawh hlihsak a ni ang.

5. A lo thi a nih pawhin Ailawng thlanmualah phum loh tur a ni.